LYNX: intelixencia artificial para entender mellor a túa información
En imaxin, levamos máis de 25 anos traballando para que o mundo se entenda mellor a través da linguaxe. Hoxe, damos un novo paso con LYNX, o noso novo proxecto para transformar a forma en que administracións públicas, medios de comunicación e empresas acceden, interpretan e utilizan a súa información.
Un novo xeito de buscar e obter respostas
En moitas organizacións, a información está dispersa en bases de datos, documentos PDF, arquivos legais, informes técnicos ou páxinas web. Buscar unha resposta concreta pode supor tempo, erros e frustración. Por iso nace LYNX: unha plataforma conversacional que combina modelos de linguaxe (LLMs) con recuperación semántica de documentos (RAG: Retrieval-Augmented Generation) para ofrecer respostas precisas, contextuais e verificables, directamente en linguaxe natural.
Pensado para sectores onde a información importa (moito)
A solución aplicarase inicialmente en dous ámbitos nos que temos ampla experiencia:
- Administración pública: para mellorar a atención cidadá, resolver consultas sobre trámites, normativas ou subvencións, e reducir a carga de traballo en departamentos saturados.
- Medios de comunicación: para axudar a xornalistas a consultar a hemeroteca, buscar fontes fiables ou analizar tendencias, mantendo sempre o contexto e a fiabilidade das respostas.
Pero LYNX vai máis alá: poderá adaptarse a calquera empresa ou institución que manexe grandes volumes de información desestruturada e precise dar resposta a clientes ou persoal da empresa.
Un sistema flexible, seguro e multilingüe
LYNX foi deseñado para ser modular e interoperable. Permitirá integrar diferentes modelos de linguaxe —coma ChatGPT, DeepSeek, LLaMA, ou modelos específicos como Carvallo ou Salamandra— e seleccionar o máis axeitado segundo o tipo de dato, o contexto ou o nivel de seguridade esixido.
Ademais, porase especial atención nas linguas cooficiais, como o galego, ou o catalán, para garantir que a IA fale coma falamos nós.
IA con propósito: soberanía tecnolóxica e valor local
Nun momento no que as grandes tecnoloxías de IA están controladas por unhas poucas multinacionais, LYNX aposta por unha aproximación ética e soberana. O sistema poderá funcionar sen enviar datos fóra da organización, respectando a privacidade e evitando a dependencia de servizos externos.
Contará tamén co apoio científico-técnico do CiTIUS (Universidade de Santiago de Compostela) para mellorar os modelos abertos existentes e adaptalos ao contexto lingüístico e institucional do noso país.
Apoio do Igape
Este proxecto foi subvencionado no marco da convocatoria IA360 do Instituto Galego de Promoción Económica (Igape). Forma parte do Plan de Recuperación, Transformación e Resiliencia, financiado pola Unión Europea – NextGenerationEU.
Se queres máis información sobre o proxecto ou estás interesado/a en colaborar, non dubides en contactarnos.
En imaxin, a intelixencia está en diálogo.
