CatForm

Ficha

Estado: Proxecto subvencionado en desenvolvemento
Duración: 12 meses, do 01/09/2026 ao 31/08/2027
Programa de financiamento: PLG002 – Subvencions per a projectes d’incorporació de la llengua catalana en productes tecnològics i de foment del català en l’àmbit digital, do Departament de Política Lingüística da Generalitat de Catalunya
Entidade participante: imaxin
Web do proxecto: catform.opentrad.com (proximamente)

Resumo

CatForm é un proxecto de I+D+i de imaxin para desenvolver unha solución de asistencia lingüística en catalán integrada directamente nos contornos web de traballo.

O proxecto combinará servizos de tradución automática e corrección lingüística con extensións para os navegadores Chrome e Edge. O obxectivo é que unha persoa poida traducir ou revisar un texto directamente nos campos dunha aplicación web, sen ter que copialo, acceder a outra ferramenta e volver posteriormente á aplicación orixinal.

CatForm apoiarase na infraestrutura e nos servizos lingüísticos de Opentrad e desenvolverá sobre eles unha nova capa de integración orientada especialmente a administracións públicas e empresas que traballan de forma habitual con formularios, aplicacións de xestión, CRM, ERP, intranets ou plataformas de administración electrónica.

O reto

Unha parte cada vez maior dos textos que se producen nun contorno profesional escríbese directamente en aplicacións web. Con todo, as ferramentas lingüísticas dispoñibles non sempre están integradas nestes espazos.

Esta necesidade non parte unicamente dunha proposta teórica. No traballo de imaxin con administracións públicas e empresas, identificamos casos reais nos que as propias persoas usuarias sinalan os formularios e as aplicacións web como puntos onde resulta máis difícil garantir a calidade lingüística dos contidos.

Aínda que unha persoa dispoña de tradutores, correctores ou outras ferramentas cando traballa con documentos, pode perder ese apoio cando introduce información directamente nunha aplicación corporativa. Corrixir ou traducir un texto obriga entón a interromper o traballo, copiar o contido noutra ferramenta, procesalo e volver introducilo na aplicación.

CatForm parte deste problema para explorar un enfoque diferente: levar a tecnoloxía lingüística ao lugar onde se está a escribir, integrándoa no propio fluxo de traballo.

A achega de imaxin

CatForm construirase sobre a experiencia acumulada por imaxin durante máis de dúas décadas en tradución automática, corrección lingüística e desenvolvemento de tecnoloxías para linguas cooficiais.

Unha das principais bases tecnolóxicas do proxecto será Opentrad, plataforma na que imaxin traballa desde 2005 e que ao longo destes anos evolucionou incorporando diferentes motores, modelos e servizos lingüísticos, así como integracións con sistemas de administracións, empresas e medios de comunicación.

CatForm supón un novo paso nesta evolución. O obxectivo non é desenvolver unicamente outro tradutor ou corrector web, senón investigar como estes servizos poden integrarse de maneira sinxela nas aplicacións que as persoas empregan na súa actividade diaria.

O proxecto aproveitará compoñentes, API, modelos e infraestrutura xa existentes e concentrará o novo desenvolvemento na integración no navegador, a experiencia de usuario, a ampliación dos recursos lingüísticos para o catalán e a conexión entre os distintos servizos.

Que imos desenvolver

O proxecto articularase arredor de dúas formas complementarias de acceso aos servizos lingüísticos.

Por unha banda, desenvolverase un portal web de CatForm desde o que se poderá acceder a servizos de tradución e corrección en catalán.

Por outra, crearanse extensións para Chrome e Edge que permitirán utilizar estas funcionalidades directamente sobre os campos de texto das aplicacións web. Esta integración permitirá actuar sobre contidos introducidos en formularios, sistemas de xestión administrativa, CRM, ERP, intranets, plataformas de atención ao público ou outras aplicacións corporativas.

O desenvolvemento incluirá tamén o backend e as API necesarias para conectar estes compoñentes cos servizos lingüísticos existentes, así como unha ampliación das regras do corrector de catalán e os correspondentes procesos de validación funcional e lingüística.

Tecnoloxía e enfoque

CatForm seguirá unha arquitectura baseada en servizos e API que permita desacoplar a interface de usuario dos distintos compoñentes lingüísticos.

Este enfoque permitirá reutilizar a infraestrutura de Opentrad e combinar diferentes servizos de tradución e corrección sen vincular o funcionamento de CatForm a un único motor ou modelo.

Unha parte específica do traballo estará dedicada á interacción entre as extensións do navegador e as aplicacións web. O obxectivo é conseguir que a asistencia lingüística poida utilizarse de maneira natural sobre os campos de edición, de modo que se reduza ao mínimo a alteración do fluxo de traballo da persoa usuaria.

O desenvolvemento realizarase de forma iterativa mediante metodoloxía Scrum, incorporando progresivamente análise funcional, UX, desenvolvemento das extensións, backend, integración de servizos lingüísticos e mellora do corrector.

Validación, piloto e melloras

A validación será unha parte transversal do proxecto. CatForm deberá funcionar sobre aplicacións web de características moi diferentes e, ao mesmo tempo, ofrecer resultados lingüísticos adecuados para un uso profesional.

Por este motivo, realizaranse probas funcionais das extensións e da súa integración con diferentes tipos de campos e aplicacións web, xunto con procesos específicos de QA e validación lingüística.

As probas servirán tamén para analizar a experiencia de uso e detectar situacións nas que a integración poida interferir coas aplicacións existentes. Os resultados obtidos durante estas fases utilizaranse para introducir axustes antes da posta en servizo da solución.

Resultados esperados

Ao finalizar o proxecto, está previsto dispoñer dunha plataforma funcional de asistencia lingüística en catalán composta por un frontal web, extensións para Chrome e Edge, servizos backend e mecanismos de integración coas tecnoloxías lingüísticas de Opentrad.

O proxecto permitirá ademais ampliar os recursos utilizados para a corrección do catalán e xerar coñecemento sobre a integración de servizos lingüísticos en aplicacións web profesionais.

CatForm contempla tamén a posibilidade de que a interacción das persoas usuarias contribúa a xerar novos recursos lingüísticos. As correccións seleccionadas polas persoas usuarias e, cando sexa posible, as revisións realizadas sobre traducións automáticas poden constituír información útil para mellorar e avaliar futuras tecnoloxías da linguaxe.

Esta utilización estará condicionada á autorización expresa da organización ou cliente. Os datos non se compartirán por defecto e, cando corresponda, aplicaranse procesos de anonimización antes da súa posible utilización en iniciativas públicas de desenvolvemento de intelixencia artificial en catalán, como AINA. Para este ámbito, imaxin aproveitará tamén a experiencia adquirida en proxectos desenvolvidos co Barcelona Supercomputing Center relacionados con avaliación de tradución e anonimización de contidos.

Impacto

CatForm busca reducir unha das barreiras prácticas para o uso habitual do catalán en contornos dixitais profesionais: a separación entre as ferramentas lingüísticas e as aplicacións nas que realmente se producen os textos.

A integración de tradución e corrección directamente no navegador pode facilitar que administracións e empresas utilicen o catalán de forma máis sinxela nos seus procesos cotiáns, especialmente en aplicacións que non incorporan por si mesmas ferramentas lingüísticas.

Para imaxin, o proxecto permitirá avanzar nunha liña de I+D+i orientada a converter as tecnoloxías da lingua en servizos cada vez máis integrados nos procesos de traballo. CatForm incorporarase ao ecosistema de Opentrad, o que amplía o seu alcance desde o acceso tradicional a servizos lingüísticos cara a modelos de asistencia contextual e integrada.

O proxecto comezou en setembro de 2026 e rematará en agosto de 2027. Durante o seu desenvolvemento, iremos incorporando información sobre a súa evolución e proximamente estará dispoñible catform.opentrad.com como espazo específico do proxecto.

Financiamento

Proxecto subvencionado no marco da convocatoria PLG002 – Subvencions per a projectes d’incorporació de la llengua catalana en productes tecnològics i de foment del català en l’àmbit digital, promovida polo Departament de Política Lingüística da Generalitat de Catalunya.

Amb el suport de la Generalitat de Catalunya.